Azərbaycan, Bakı, 30 oktyabr/ Trend / Gələn ilin sonunadək "Azərenerji" SC və Asiya İnkişaf Bankı arasında energetika sahəsində yeni əməkdaşlıq planı imzalanacaq, - SC - nin vitse -prezidenti Marlen Əsgərov cümə axşamı bildirib.
Onun sözlərinə görə, "Azərenerji" və bank arasında əməkdaşlıq planı beşillik dövrə razılaşdırılıb və onun realizəsi 2009 - cu ildən başlayacaq. Plan Azərbaycanda elektrik ötürücü xətlərin bərpası layihəsi çərçivəsində hazırlanıb.
Layihənin ümumi dəyəri 220 mln.dollar təşkil edir. Bunun 160 mln. dolları AİB - in kreditin payına düşür. Qalan vəsaitlər "Azərenerji" tərəfindən ayrılacaq.
AİB-in Direktorlar Şurası sentyabrda enerji layihəsinin realizəsi üçün 160 mln. dollar həcmində kreditin ayrılmasını təsdiqləyib.
Layihə çərçivəsində, Mingəçevir su - elektrik stansiyasından Abşeron yarımstansiyasınadək ikikonturlu 220 kilovoltluq elektrik ötürücü xəttinin çəkilişi nəzərdə tutulur. 220/110 kilovoltluq yarımstansiyanı 110 kilovoltluq elektrik ötürücü xətti ilə birləşdirmək nəzərdə tutulur.
Layihənin əsas məqsədi elekrik ötürücü sistemin gücünü artırmaq və adekvat, etibarlı enerji təchizatı, elektrik ötürücü xətlərin imkanlarının genişləndirilməsi, enerji təchizatının keyfiyyət və etibarlılığının artırılması yolu ilə iqtisadi artımdakı regional disbalansı azaltmaqdır.
İyulda Asiya bankı ölkə hökuməti ilə kredit sazişi üzrə danışıqlar aparıb. Sazişə əsasən, kredit resursları Azərbaycana, 9 il güzəştli dövr olmaqla, 25 il müddətinə və illik libor+0,2 faiz dərəcəsi ilə veriləcək.
Kredit sazişinin Asiya İnkişaf Bankının prezidenti Haruhiko Kurodanın (Haruhiko Kuroda) Azərbaycana noyabrın 20-nə planlaşdırılan səfəri zamanı imzalanacağı gözlənilir.
AİB və Azərbaycan hökuməti 1999-cu ildən əməkdaşlıq edir. İndiyədək bank ölkə üçün dövlət zəmanəti altında 304 mln. dollar həcmində kredit təsdiqləyib.
Müəlliflə əlaqə saxlamaq üçün elektron ünvan: [email protected]
