Azərbaycan, Bakı, 04 noyabr/ Trend , müxbir S.Əliyev/ Hazırda "Azəri-Çıraq-Günəşli" yataqları blokunda neft hasilatı həcmi sentyabrda yataqda platformaların dayandırılmasınadək olan sutkada təqribən 900 min barelə nisbətdə sutkada 600 min barel təşkil edir. Bu barədə çərşənbə axşamı SOCAR şirkətinin geologiya, geofizika və yataqların işlənməsi üzrə birinci vitse-prezident Xoşbəxt Yusifzadə bildirib.
"Azəri" - "Çıraq" - "Günəşli" yataqlarının işlənməsi üzrə operator BP sentyabrın 17 - də "Mərkəzi Azəri" yatağında neft hasilatını dayandırıb və yataqda quraşdırılan platforma personalı dənizdə qazın aşkar olunması səbəbindən evokuasiya edilib. Təhlükəsizlik məqsədi ilə yatağın qərb hissəsində "Qərbi Azəri" platformasından da hasilat dayandırılıb və bir qədər sonra bərpa olunub.
Yusifzadə bildirib ki, hazırda "Azəri" yatağının mərkəzi hissəsində quraşdırılan platformada subasma quyularının işə salınma prosesi gedir. Personalın bir hissəsi platformaya qaytarılıb. Yataqda geotexniki və geofiziki işlər aparılır.
"Yaxın vaxtlarda quyularda geofiziki işlər aparılacaq", - deyə SOCAR-ın vitse-prezidenti bildirib.
Yusifzadə bildirib ki, qazın aşkarlanma səbəbləri müəyyən olunduqdan sonra hasilat bərpa olunacaq. O, istismarın nə zaman bərpa olunacağını bildirməyib.
"Azəri-Çıraq-Günəşli" yatağında Bakı-Tbilisi-Ceyhan boru kəməri ilə ixrac olunan Azeri Light növlü neft hasil edilir.
Məqalə müəllifi ilə əlaqə ünvanı: [email protected]
