Azərbaycan, Bakı, 20 noyabr/ Trend / Yanvar-oktyabrda SOCAR (Azərbaycan Dövlət Neft Şirkəti) ölkənin dövlət büdcəsinə təqribən 991 mln. manat köçürüb. Bu göstərici 2007-ci ilin analoji dövründə 879 mln. manata bərabər olub. Bu barədə SOCAR-ın məlumatında bildirilir.
SOCAR bu dövr ərzində Dövlət Sosial Müdafiə Fonduna 2007-ci ilin yanvar-oktyabrının 64,3 mln. manatına nisbətdə 84,3 mln. manat həcmində köçürmə edib.
SOCAR oktyabrda dövlət büdcəsinə təqribən 87 mln. manat köçürüb ki, bu göstərici ötən ilin analoji dövründə 79 mln. manata bərabər olub. Oktyabrda Dövlət Sosial Müdafiə Fonduna ötən ilin analoji dövrünün 7,8 mln. manatına nisbətdə 14,2 mln. manat köçürüb.
Azərbaycan Dövlət Neft Şirkəti 2007-ci ildə ölkənin dövlət büdcəsinə 1 mlrd. 81 mln. manat köçürüb ki, bu göstərici 2006-cı ildə 734 mln. 636 min manata bərabər olub.
Ötən il Dövlət Sosial Müdafiə Fonduna 2006-cı ilin 52 mln. 79 min manatına nisbətdə 78 mln. 48 min manat köçürülüb.
