Qazaxıstan, Astana, 27 mart / Trend müxbir K.Konırova/
"Azərbaycan Dövlət Neft Şirkəti - SOCAR Gürcüstan bazarında qazı hər min kubmetrinə görə 167 dollardan satır", - Azərbaycanın Qazaxıstandakı fövqəladə və səlahiyyətli səfiri Lətif Qəndilov, "KazMunayQaz"ın (KMQ) başçısı Kairquldı Kabıldinin SOCAR-ın Gürcüstanda qazı min kubmetrinə görə 400 dollar qiymətində satması haqda bəyanatına cavab olaraq bildirib.
"Mən SOCAR-ın Bakıdakı ofisi ilə əlaqə saxladım və oradan mənə məlumat verdilər ki, SOCAR Gürcüstana bazarına qazı öz affilə edilmiş şirkəti Gas Sunline vasitəsilə tədarük edir və o, qazı əhali üçün min kubmetrinə görə 167 dollar, müəssisələr üçün 200 dollar qiymətinə satır. Azərbaycan şirkəti Gürcüstan bazarında mövcud olan Rusiya şirkəti ITERA-ya da eyni qiymətə qaz satır", - Azərbaycanın səfiri Lətif Qəndilov qeyd edib.
O hesab edir ki, KMQ-nın başçısının SOCAR-ın Gürcüstanda qazı satdığı qiymət haqda çərşənbə günü mətbuat konfransında dilə gətirdiyi rəqəm həqiqəti əks etdirmir.
"Mən həmçinin hesab edirəm ki, SOCAR-ın "Tbilqaz"ın aktivlərini almaq niyyətində olması haqda informasiya da həqiqətə uyğun deyil. İki ölkənin milli şirkətlərini birgə əməkdaşlıq üzrə daha qlobal planlar bağlayır", - səfir əlavə edib.
