Azərbaycan, Bakı, 06 aprel / Trend , müxbir E.İsmayılov /
"Bu il SOCAR (Azərbaycan Dövlət Neft Şirkəti) "Z.Tağıyev" adına neft-qaz istehsalı idarəsinin sahəsində bioşəhərciyin yaradılması üzrə işlərə başlayacaq", - SOCAR-ın ekologiya üzrə vitse-prezidenti Muxtar Babayev deyib.
"Bu il bu şəhərciyin layihələndirilməsi işi başlayacaq və ola bilər ki, işlərin bir hissəsini biz bu il görək", - Babayev bildirib.
Yeni şəhərcik insanların yaşayışı üçün nəzərdə tutulmayıb. Şirkət onun ərazisində ağac, kol və müxtəlif növ güllər yetişdirməyi planlaşdırır.
Babayevin sözlərinə görə, bu şəhərcikdə qaz, elektrik enerjisi və su ilə təminatı alternativ eneji mənbələri ilə həyata keçirmək planlaşdırılır. Qazla təminatın bir hissəsi yataqdan havaya sovrulan səmt qazının hesabına ediləcək. Şəhərciyin elektrik enerjisinin bir hissəsi günəş enerjisi hesabına həyata keçiriləcək. Suvarma üçün su isə qrunt sularının təmizlənməsi və dəniz suyunun şirinləşdirilməsi hesabına aparılacaq.
"Bu layihə çərçivəsində biz xarici ölkələr və əcnəbi şirkətlərin təcrübəsindən yararlanmağa çalışacağıq", - Babayev deyib.
Onun sözlərinə görə, SOCAR alternativ enerji mənbələrindən istifadə üzrə tədqiqat işləri aparır. "İlk növbədə, alternativ enerji mənbələrinə yalnız Azərbaycan deyil, həm də bütün dünya tərəfindən böyük diqqət ayrılır", - Babayev qeyd edib.
Məqalə müəllifi ilə əlaqə ünvanı: [email protected]