Azərbaycan, Bakı, 01 may / Trend /
"SOCAR (Azərbaycan Dövlət Neft Şirkəti) Gürcüstana sutkada təxminən 1,9-2 milyon kubmetr qaz tədarük edir", - neft sənayesindəki mənbə məlumat verib. Bu ilin qışında tədarüklərin həcmi 5 milyon kubmetrə çatıb, ancaq istehlakın azalması səbəbindən (hava şəraitinin yaxşılaşması) qaz tədarükü müvafiq olaraq azalıb.
Gürcüstana çatdırılan qazın bir hissəsini SOCAR-ın öz mülkiyyətində olan paylama şəbəkələri əldə edir. İlin sonun qədər SOCAR Gürcüstan təsərrüfatının SOCAR Energy Georgia-nın (SOCAR-ın törəmə şirkəti) idarəetməsinə keçmiş 31 qazpaylayıcı şəbəkəsinə təxminən 60 milyon kubmetr qaz tədarük etməyi planlaşdırır.
Ötən ilin dekabrında SOCAR şirkəti və Gürcüstan hökuməti 30 qazpaylayıcı təsərrüfatı və qazpaylayıcı şəbəkənin şirkətin idarəetməsinə verilməsi haqda razılaşma imzalayıblar. Bu təsərrüfatlar Gürcüstanın Kaxeti, Mtsxeta-Mtianeti, Şida və Kvemo Kartli, Acarıstan, Quriya, İmereti, Sameqrelo kimi regionlarını əhatə edir. Bu şəbəkələrə 24 şirkət tərəfindən istismar edilirdi. Hazırda şirkət bu şəbəkələrin bərpa və yenidən qurulması istiqamətində işlər aparır. İşlər 40 milyon həcmində sərmayə proqramı çərçivəsində aparılacaq. Bu layihə çərçivəsində bu 30 qazpaylayıcı təsərrüfatların abunəçilərinin sayını 150 min artırılması planlaşdırılır. Hazırda bu rəqəm cəmi 45 mindir. Proqram çərçivəsində birinci ildə abunəçilərin sayının 36 min artırılması nəzərdə tutulub. Qalan artımları qarşıdakı iki il ərzində həyata keçirmək planlaşdırılır.
Həmçinin apreldə SOCAR Energy Georgia azərbaycanlıların kompakt yaşadığı Marneuli rayonunun qazpaylama şəbəkəsini də istifadəyə götürüb. Əvvəllər bu şəbəkənin sahibi Wissol şirkəti idi. O, qazı SOCAR-dan alaraq, Marneulidə satışı ilə məşğul olurdu. İndi bu istiqamətdə bütün işləri SOCAR Energy Georgia həyata keçirəcək.
"Hazırda biz şəbəkələrin idarə heyəti və şəbəkələrin özləri ilə tanış oluruq. Artıq buraya qaz ötürülür", - Məmmədov deyib.
Bu paylama şəbəkələrinin alınması, onların inkişafı və idarəedilməsi 40 milyonluq sərmayə proqramına daxil edilməyib. "Kommersiya baxımından bu yaxşı sövdələşmədir. Texniki göstəricilər, biznes-plan, sərmayə - bütün bunlar artıq hazırlanıb, amma beynəlxalq maliyyə böhranı ilə bağlı düzəlişlər var. Buna görə də, dəqiq rəqəm söyləməyəcəm, ancaq təxminən üç milyon dollardan az olmayacaq", - bir müddət əvvəl Məmmədov deyirdi.
Məqalə müəllifi ilə əlaqə ünvanı: [email protected]