Azərbaycan, Bakı, 14 avqust / Trend , müxbir A.Bədəlova /
OPEK-in proqnozlarına əsasən, dünyanın neftə olan tələbatı 2010-cu ildə sutkada 0,5 milyon barel artaraq sutkada 84,41 milyon barel təşkil edəcək. OPEK-in neft bazarı üzrə avqust məruzəsində deyildiyi kimi, artım dünya iqtisadiyyatının bərpası ilə izah olunacaq.
OPEK-in proqnozlarına əsasən, növbəti ildə neft tələbatının daha çox artımı İqtisadi Əməkdaşlıq və İnkişaf Təşkilatına (İƏİT) daxil olmayan ölkələrdə, Çində, Hindistanda, Yaxın Şərqdə və Latın Amerikasında müşahidə ediləcək.
OPEK-in proqnozlarına əsasən, İƏİT ölkələri növbəti ildə sutkada 45,34 milyon barel neft sərf edəcək ki, bu da 2009-cu ildəki göstəricidən 0,29 milyon barel azdır. Keçmiş Sovet İttifaqı ölkələrində tələbat 2009-cu ildəki 3,99 milyon barelə nisbətdə sutkada 4,02 milyon barel təşkil edəcək.
2009-cu ildə, OPEK-in proqnozlarına əsasən, neftə olan dünya tələbatı 1,6 milyon barel azalaraq sutkada 83,91 milyon barel təşkil edəcək.
İƏİT ölkələrində bu ildə tələbatın 1,9 milyon barel azalaraq sutkada 45,64 milyon barel təşkil edəcəyi proqnozlaşdırılır. Bu zaman, proqnozlara əsasən, təşkilata daxil olmayan ölkələrdə tələbat sutkada 0,2 milyon barel artacaq.
"İlin birinci yarısında dünyanın neftə olan tələbatı sutkada 2,7 milyon barel azalıb, ilin ikinci yarısında da onun sutkada 0,6 milyon azalacağı gözlənilir", - OPEK-in məruzəsində deyilir.
OPEK 2009-cu ildə ABŞ-da neftə olan tələbatın sutkada 0,9 milyon barel azalacağını gözləyir. İnkişaf etməkdə olan ölkələrdə sutkada 0,3 milyon barel artım müşahidə ediləcək.
Məqalə müəllifi ilə əlaqə ünvanı: [email protected]
