Azərbaycan, Bakı, 19 avqust / Trend , müxbir E.İsmayılov /
ARDNŞ Azərbaycanın Xəzər dənizi sektorunda "Ümid" perspektivli qaz strukturunda ilk kəşfiyyat quyusunun qazılması çərçivəsində layihə üzrə olan 6500 metrin 700 metrini qazıb. Bu ARDNŞ-in son on beş il ərzində özü həyata keçirdiyi ilk kəşfiyyat qazmasıdır.
"Strukturda kəşfiyyat qazma işləri davam edir və artıq 700 metr qazılıb", - mənbədən bildirilib.
Onun sözlərinə əsasən, bu strukturda qazma işləri ötən həftə başlayıb, artıq 700 metr qazılıb. Bu, yuxarı təbəqənin qazma üçün əlverişli olması ilə izah olunur.
Mənbənin fikrincə, bu strukturda qazma işləri çətin olacaq, belə ki, yükəsk təzyiqin olması, həmçinin çətin coğrafiyası ilə fərqlənir.
"Bu il təxminən dörd min metr qazma işinin aparılması planlaşdırılır", - ARDNŞ-dan digər mənbə bildirib.
Strukturda kəşfiyyat quyularının qazılmasını ARDNŞ-in tərkibinə daxil olan "Bayıl limanı" Dəniz Kəşfiyyat Qazma İdarəsi həyata keçirəcək.
Əvvəlcə ARDNŞ kəşfiyyat quyusunun qazılması həyata keçirilən "Ümid-1" platformasının inşasını tamamlayıb. "Ümid-1" platforması hələ tikilib başa çatmayan"Çıraq-6" platforması bazasında inşa edilib və proqram çərçivəsində ən böyük obyektdir, onun hündürlüyü 72 metr təşkil edir. Platforma "Bulla-dəniz" dəniz yatağının 15 kilometrliyində, dənizin 58 metr dərinliyində yerləşir. Ümumilikdə platformadan altı qaz quyusunun qazılması planlaşdırılır.
"Ümid" perspektivli strukturunda güman edilən qaz ehtiyatları 300 milyard kubmetr həcmində qiymətləndirilir, güman edilən qaz kondensatı ehtiyatları isə 30-40 milyon ton həcmində qiymətləndirilir.
Məqalə müəllifi ilə əlaqə ünvanı: [email protected]
