Azərbaycan, Bakı, 2 oktyabr / Trend /
Oktyabrın əvvəllərində ARDNŞ sıxıcı kompressor stansiyasının (SKS-2) gücünün artırılması çərçivəsində"Neft daşları" dəniz neft-qaz yatağında quraşdırılan dörd yeni əlavə aqreqatı istifadə etməklə qazın nəqlinə başlayacaq, ARDNŞ-dən cümə günü yayılan məlumatda deyilir.
Stansiyada aparılan yenidənqurma işləri artıq başa çatıb. Hazırda quraşdırılmış avadanlığın sınaq işləri aparılır. ARDNŞ-in "Azneft" İstehsalat Birliyi tərəfindən yaradılan komissiya stansiyada qurulan avadanlığa baxış keçirib.
Bu kompressor stansiyasının gücünün artırılması ARDNŞ-in 2009-cu ildə öz qazının satışı proqramının bəndlərindən biridir.
Görülən işlərdən sonra stansiyanın gücü sutkada 7,4 milyon kubmetrdən 11-12 milyon kubmetrə çatıb.
Dörd əlavə aqreqatın quraşdırılması qərarı rezerv gücünün olmaması səbəbilə verilib.
Əhəmiyyətli dərəcədə neft ehtiyatına malik olan "Neft Daşları" yatağı Azərbaycanın dənizdə neft hasilatına başladığı ilk yataqdır. ARDNŞ geoloqlarının qiymətləndirməsinə görə, "Neft Daşları" yatağında qalan neft ehtiyatının həcmi 30 milyon ton təşkil edir. Bu il yataqda neft hasilatının artırılması üçün zəruri olan 21 quyu qazılması planlaşdırılır.
Azərbaycanda 57 neft-qaz yatağı var ki, bunlardan 18-i dənizdə, qalanları isə quruda yerləşir. Hazırda ARDNŞ-in işçi ştatı 62 min nəfərdən çoxdur.
