...

ARDNŞ Türkiyənin qaz bazarında möhkəmlənmək niyyətindədir

Energetika Materials 7 May 2010 17:48 (UTC +04:00)

Azərbaycan, Bakı, 7 may /Trend, müxbir E.İsmayılova/

Türkiyə ilə Azərbaycan qazının onun ərazisindən nəqli məsələsi barədə razılaşma "dövrəni qapamağa imkan verib", ARDNŞ-yə bütün istiqamətlərdə qaz ixracı üzrə xərclərin dəyərini müəyyən etməsinə şərait yaradıb. Bunu cümə günü ARDNŞ prezidenti Rövnəq Abdullayev bildirib.

"Türkiyə bizim qazın onun ərazisindən keçməsinə icazə verdi. Bu, bizə Rusiya ərazisindən qaz satışının dəyərini, eləcə də Avropanın istənilən nöqtəsində qazın dəyərini müəyyən etməyə imkan verir. Bundan sonra biz potensial alıcılarla danışıqlara başlayacağıq. Və harada qiymət yüksəkdirsə, biz öz qazımızı orada satacağıq. Dövrənin qapandığını söyləmək olar. Bizim artıq şimal, cənub, qərb istiqamətlərdə, eləcə də Türkiyə, Gürcüstan və Avropa istiqamətində qiymətlərimiz var", - Abdullayev deyib.

Onun sözlərinə görə, Azərbaycan qazının ixracı istiqamətlərinə baxılarkən heç bir variant istisna edilmir. Rusiya variantına da baxılır, İran Azərbaycan qazına böyük maraq göstərir. "İranın istəyi var [qaz idxalına], hazırda biz danışıqlar aparırıq. Əgər onlar bizimlə beynəlxalq standartlara uyğun və yaxşı qiymətə müqavilə bağlasalar, nəyə görə biz onlara qaz satmayaq", - Abdullayev bildirib.

ARDNŞ rəhbəri bildirib ki, iqtisadi baxımdan Avropa bazarlarına çıxarılmasındansa, Azərbaycan qazının Türkiyə bazarında satışı daha məqsədəuyğundur. "Azərbaycan Türkiyəyə nə qədər çox qaz satsa, ölkə üçün bir o qədər yaxşıdır. Tranzitə görə artıq pul xərcləyib Avropaya çıxmaq əvəzinə qazı Türkiyəyə satıb əlavə xərclərdən qaçmaq mümkündür", - Abdullayev bildirib.

Xəbər lenti

Xəbər lenti