Azərbaycan, Bakı, 12 iyul /Trend/
Hazırda Azərbaycanın yeraltı qaz anbarlarına vurulan qazın həcmi sutkada 10 milyon kubmetrə yaxın təşkil edir. Bu barədə bazar ertəsi neft-qaz sahəsindəki mənbə məlumat verib.
Bu günə qaz anbarlarında 1,8 milyard kubmetrə yaxın həcmdə qaz ehtiyatları yaradılıb.
2010-cu ildə Azərbaycanın yeraltı qaz anbarlarında qaz ehtiyatlarının həcmi üç milyard kubmetr təşkil edəcək. Ötən il bu göstərici 2008-ci ildəki 1,4 milyard kubmetrə qarşı 2 milyard kubmetrə yaxın həcmdə olub.
Hazırda respublikada iki yeraltı qaz anbarı - Qaradağ və Qalmaz fəaliyyət göstərir.
ARDNŞ-in məlumatına görə, keçən il Qalmaz yeraltı qaz anbarına 507,7 milyon kubmetrə yaxın, Qaradağ anbarına isə 794,9 milyon kubmetr qaz vurulub.
Payız-qış mövsümündə istifadə olunmaq üçün Azərbaycanın yeraltı qaz anbarlarına qaz vurulması prosesi oktyabrda başa çatır.
