Azərbaycan, Bakı, 12 avqust /Trend, müxbir E.İsmayılov/
ARDNŞ (Azərbaycan Dövlət Neft Şirkəti) şirkətin balansında olan Qalmaz yeraltı qaz anbarı ərazisində yeni quyunu istismara verib. Bu barədə "Kompleks Qazma İşləri" Trestinin rəsmi saytında yerləşdirilmiş məlumatda deyilir. Trest ARDNŞ-in tərkibinə daxildir.
Məlumatda deyildiyinə görə, daha bir quyunun qazılması üzrə işlər başa çatıb. Hazırda onun istifadəsinə başlanılıb.
Hazırda respublikada iki yeraltı qaz anbarı - "Qaradağ" və "Qalmaz" fəaliyyət göstərir. Mənbənin sözlərinə görə, qazın vurulması prosesi hələ davam edir, lakin yeraltı qaz anbarlarına artıq 1,9 milyard kubmetrdən çox qaz vurulub.
2010-cu ildə Azərbaycanın yeraltı qaz anbarlarında qaz ehtiyatlarının həcmi üç milyard kubmetr təşkil edəcək. Ötən il bu göstərici 2008-ci ildəki 1,4 milyard kubmetrə qarşı, 2 milyard kubmetrə yaxın olub.
ARDNŞ-in məlumatına görə, keçən il "Qalmaz" yeraltı qaz anbarına 507,7 milyon kubmetr, "Qaradağ" anbarına isə 794,9 milyon kubmetr qaz vurulub.