Azərbaycan, Bakı, 18 sentyabr /Trend, müxbir E.İsmayılov/
Avropa İttifaqı ilə AGRİ (Аzerbaijan-Georgia-Romania Interconnector) layihəsinin texniki iqtisadi əsaslandırmasının (TİƏ) hazırlanması üçün vəsaitlərin cəlb edilməsi üzrə danışıqların aparılması Rumıniyaya tapşırılıb. Bu barədə şənbə günü ARDNŞ rəhbəri Rövnəq Abdullayev deyib.
Onun sözlərinə görə, layihənin ətraflı detalları və onun dəqiq dəyəri barədə TİƏ hazırlandıqdan sonra danışmaq olar. Abdullayevin fikrincə, TİƏ-nin hazırlanmasına 2-3 milyon avro lazım olacaq.
АGRI (Azerbaijan-Georgia-Romania Interconnector) maye qazın Avropaya nəqli üzrə Azərbaycan-Gürcüstan-Rumıniya layihəsidir.
Layihə Azərbaycandan maye qazın Rumıniyaya tədarükünü nəzərdə tutur. Bunun üçün Gürcüstan və Rumıniyada maye qaz istehsalı üzrə iki zavodun tikilməsi nəzərdə tutulur. İlkin məlumatlara görə, layihənin dəyəri 4-6 milyard avro təşkil edir.
Layihə Azərbaycan qazının Gürcüstanın Qara dəniz sahillərindən qaz kəmərləri vasitəsilə nəqlini, orada xüsusi terminalda mayeləşdirilməsini və bundan sonra tankerlərlə Rumıniyanın Konstansa limanındakı terminala çatdırılmasını nəzərdə tutur. Sonra maye qaz təbii qaz halına gətiriləcək və ölkə ərazisində mövcud olan qaz infrastrukturlarından istifadə olunmaqla Rumıniya və digər Avropa ölkələrinin tələbatının təmin edilməsinə yönəldiləcək.