Azərbaycan, Bakı, 13 noyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) ilin sonuna qədər İrana böyük həcmdə qaz nəqlinə hazır olacaq. Bu barədə şənbə günü şirkətin prezidenti Rövnəq Abdullayev deyib.
Onun sözlərinə görə, hazırda ARDNŞ Astara rayonunda altı kompressordan ibarət olacaq yeni kompressor stansiyasının tikintisi üzrə qrafikə uyğun iş aparır. İlin sonuna qədər Dövlət Neft Şirkətinin İrana böyük həcmdə qaz nəqli üçün imkanı yaranacaq.
Bir müddət əvvəl Adullayevin dediyi kimi, Astarada qaz kompressor stansiyasının gücünün artırılması üzrə ARDNŞ-nin investisiya proqramının gerçəkləşməsi hər şeydən əvvəl, Naxçıvan Muxtar Respublikasının qaza olan tələbatını təmin etməyə istiqamətlənib. Hazırda Azərbaycan qazının İrana nəqli NMR-də qaz təminatı üçün həyata keçirilir. Astarada stansiyanın genişlənməsi Muxtar Respublikanı tamamilə qazla təmin edəcək.
İran tərəfi dəfələrlə ildə beş milyard kubmetrə yaxın Azərbaycan qazının alınması imkanlarını bəyan edib.
Azərbaycan və İranı ümumi uzunluğu 1474,5 kilometr (296,5 kilometri Azərbaycan ərazisində yerləşir) olan Qazı Məhəmməd - Astara - Bind-Biand qaz kəməri əlaqələndirir. Boru kəmərinin layihə üzrə ötürücülük qabiliyyəti ildə 10 milyard kubmetr təşkil edir. Marşrut 1971-ci ildə istismara verilən Qazax - Astara - İran boru kəmərinin qoludur. Bu istiqamətdə üç - Qazı Məhəmməd, Ağdaş və Qazax kompressor stansiyaları tikilib. Qaz nəqliyyatı sistemi 55 atmosfer təzyiqi gücündə nəzərdə tutulub. Boru kəmərinin diametri 1200 millimetridir.
