Azərbaycan, Bakı, 22 dekabr /Trend, müxbir E.İsmayılov/
ARDNŞ "Bahar Energy Limited" şirkəti ilə 2011-ci ildə "Bahar-2" perspektiv strukturu və "Qum Dəniz" yatağı arasında geofiziki işlərin aparılması üçün danışıqlar aparır. Bu barədə çərşənbə günü neft-qaz bazarındakı mənbə deyib.
Əvvəllər ARDNŞ "Bahar Energy Limited" ilə Xəzər dənizinin Azərbaycan sektorunda yerləşən "Bahar" və "Qum Dəniz" dəniz yataqlarının daxil olduğu blokun kəşfiyyatına, reabilitasiyasına, işlənməsinə və hasilatına dair PSA tipli müqavilə imzalayıb. Müqavilə Azərbaycan Milli Məclisi tərəfindən ratifikasiya edilib.
"Hazırda məsələ ilə bağlı bu ərazidə ikiölçülü geofiziki işlərin aparılması üçün danışıqlar aparılır", - mənbə qeyd edib.
Onun sözlərinə görə, "Bahar" və "Qum Dəniz" dəniz yataqlarının daxil olduğu blokun kəşfiyyatına, reabilitasiyasına, işlənməsinə və hasilatına dair müqavilə imzalana qədər ARDNŞ tərəfindən "Bahar-2" strukturunda artıq üçölçülü geofiziki tədqiqatlar üzrə işlərin bir hissəsi görülmüşdü.
ARDNŞ və "Bahar Energy" arasında imzalanan müqavilənin ikinci hissəsində "Bahar-2" strukturunda kəşfiyyat işlərinin aparılması nəzərdə tutulur. Üç il müddətində bir kəşfiyyat quyusunun qazılması planlaşdırılır. Əgər ehtiyac yaranarsa, dördüncü il daha bir quyu qazıla bilər. İlkin hesablamalara görə, müqavilə çərçivəsində işlərin görülməsinə "Bahar Energy Limited" şirkəti bir milyard dollar məbləğində investisiya yatıracaq.
1969-cu ildən işlənən "Bahar" yatağı Bakının cənub-şərqindən 40 kilometr məsafədə yerləşir. İndiyədək yataqdan 16,8 milyon tondan çox neft və 128 milyard kubmetrdən çox qaz hasil edilib.
