Azərbaycan, Bakı, 18 yanvar /Trend, müxbir E.İsmayılov/
Xəzərin Azərbaycan sektorunda "Şahdəniz" qaz-kondensat yatağının işlənməsinin texniki operatoru olan Böyük Britaniyanın BP şirkəti Danimarkanın "Maersk Drilling" şirkəti ilə Heydər Əliyev adına qazma qurğusunun yatağın genişmiqyaslı işlənməsi layihəsinə cəlb edilməsi üçün danışıqlar aparır. Bu barədə çərşənbə axşamı neft-qaz bazarındakı mənbə deyib.
Onun sözlərinə görə, BP şirkəti 2012-ci ildə işlər üçün qazma qurğusunun cəlb edilməsinə böyük maraq göstərir.
"BP tərəfdən maraq var, lakin hələ ki razılıq əldə olunmayıb", - mənbə bildirib.
Əvvəllər neft-qaz bazarındakı digər mənbənin dediyinə görə, "Şahdəniz"in genişmiqyaslı işlənməsi çərçivəsində nəzərdə tutulan çoxlu quyuların qazılması üçün bir "İstiqlal" qazma quyusu kifayət etmir. Məhz buna görə də BP Heydər Əliyev adına qurğunu yataqdakı işlərə cəlb etmək istəyir. "Şahdəniz"in genişmiqyaslı işlənməsi çərçivəsində iki dəniz platforması quraşdırılacaq və 30 sualtı quyu qazılacaq.
İşlənmənin birinci mərhələsi çərçivəsində yataqda ən yüksək hasilat həddi 8,6-9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində burada qaz hasilatının həcmini ildə 25 milyard kubmetrə qədər də artırmaq olar.
Yatağın ehtiyatları 1,2 trilyon kubmetr qaz qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.