Azərbaycan, Bakı, 27 yanvar /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) planları çərçivəsində "Neft Daşları" Neft Qazçıxarma İdarəsi 2011-ci il üçün Xəzərin Azərbaycan sektorundakı eyniadlı yataqda hasilatın həcminin dəstəklənməsi üzrə proqramın ilkin variantı üzərində işi başa çatdırıb. Trend-in məlumatına görə, bu barədə cümə axşamı ARDNŞ-dəki mənbə məlumat verib. Yeni proqram 2011-2015-ci illəri əhatə etməlidir.
Onun sözlərinə görə, proqram artıq baxılmaq üçün "Azneft" İstehsalat Birliyinə təqdim olunub.
Proqramın ilkin variantı çərçivəsində 70-80 yeni quyunun qazılması, müvafiq sualtı infrastrukturun, qaz toplanması sisteminin yaradılması və digər tədbirlər nəzərdə tutulub.
"Lakin bu o demək deyil ki, hazırlanmış sənəd çərçivəsində nəzərdə tutulan bütün tədbirlər qəbul ediləcək. Proqrama baxıldıqdan sonra ona əlavə və dəyişikliklər edilə bilər", - mənbə bildirib. Proqramın bu il həyata keçirilməsinə başlanması planlaşdırılır.
Bir müddət əvvəl ARDNŞ rəhbəri Rövnəq Abdullayevin dediyi kimi, şirkətin 2011-ci ildə qarşıya qoyduğu əsas məqsədlərdən biri yeni platformaların tikintisi və artıq mövcud olanların bərpası, boru kəmərlərinin çəkilməsi, "Günəşli" və "Neft Daşları" dəniz yataqlarında yeni quyuların qazılmasıdır.
ARDNŞ-nin məlumatına görə, 1949-cu ildən istismar olunan "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq, "Neft Daşları" yatağının işlənməsi 2035-ci ildə başa çatmalıdır.