Azərbaycan, Bakı, 27 yanvar /Trend, müxbir А.Bədəlova/
Xəzər regionu və Yaxın Şərqdən Aİ ölkələrinə qaz nəql etməyə yönəldilmiş "Nabukko" qaz kəməri layihəsi konsorsiumu yaxın aylarda layihə üçün qaz tədarükü üzrə uğurlu müqavilələrin imzalanmasını nəzərdə tutur. Trend-in məlumatına görə, bu barədə cümə axşamı elektron poçtla "Nabukko" layihəsinin rəsmi nümayəndəsi Kristian Dolezal deyib.
"Hazırda səhmdarlar qaz tədarükü üzrə Azərbaycanla danışıqlar aparırlar və aydındır ki, yaxın aylarda "Nabukko" üçün tədarüklər üzrə müqavilələrin imzalanması layihə üçün mühüm addım olacaq", - Dolezal deyib.
Dəyəri 7,9 mlrd. avro olan "Nabukko" layihəsinin səhmdarları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin BOTAŞ və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Qaz kəmərinin çəkilişi 2012-ci ilə təyin edilib. İlk tədarüklərə 2015-ci ildə start veriləcək.
Dolezalın fikrincə, səhmdarlar və tədarükçülər arasında ilk müqavilələrin imzalanmasından dərhal sonra "open season" prosesi gerçəkləşdiriləcək ki, bu da öz növbəsində 2011-ci ildə gözlənilən layihə üzrə qəti investisiya qərarının qəbul olunması imkanını verəcək.
"Open season" prosesi "Nabukko" qaz kəmərinin buraxılış gücünün satışa çıxarılmasını nəzərdə tutur. Layihənin səhmdarları ildə 15 milyard kubmetrə qədər (qaz kəmərinin ümumi nəqliyyat gücünün 50 faizi) qaz əldə edəcəklər, qalan 50 faiz isə şəffaflıq prinsipi altında bərabər şərtlərlə üçüncü tərəfə təklif olunacaq.
"Nabukko" layihəsi "Cənub dəhlizi" çərçivəsində daha çox rəqabətqabiliyyətli hesab olunur, Dolezal deyib. Onun sözlərinə görə, hazırda konsorsium digər boru kəməri layihələri ilə "Nabukko"nun birləşdirilməsi məsələsini müzakirə etmir.
Bu həftə "Joschka Fischer&Company" şirkətinin prezidenti, "Nabukko" qaz kəmərinin inşası layihəsinin PR məsləhətçisi Yoşka Fişer bəyan edib ki, Avropa Rusiyadan qazın tədarükünün şaxələndirilməsi məqsədilə üç rəqabət aparan qaz kəməri layihəsini birləşdirməlidir. Onun sözlərinə görə, "Nabukko" və rəqabət aparan boru kəməri layihələri bir layihədə birləşməkdən faydalanacaqlar.
Bu, birləşmək üçün ilk çağırış deyil. Bundan əvvəl ABŞ-ın İtaliyadakı səfiri Devid Torn "Nabukko" və "Cənub axını" layihələrinin birləşmə imkanlarını bəyan etmişdi.