Azərbaycan, Bakı 8 fevral /Trend, müxbir E.İsmayılov/
"Nabukko" qaz kəməri layihəsinin konsorsiumu Azərbaycan, Türkmənistan və İraqla nəqlin maksimum təhlükəsizliyini təmin etmək məqsədilə razılığa gəlmək niyyətindədir. Bu barədə "Financial Times"a müsahibəsində "RWE Supply and Trading"in icraçı direktoru Stefan Cudiş deyib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2012-ci ilə təyin edilib. İlk tədarüklərə 2015-ci ildə start veriləcək. Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin BOTAŞ və Almaniyanın RWE şirkətləridir. Onların hər biri bərabər paya - 16,67 faiz paya malikdir.
"Bütün potensial tədarükçülərlə intensiv danışıqlar aparırıq. Onlar bizə qaz nəql edə biləcəklərini və həmçinin bu nəqlləri nə vaxt həyata keçirə biləcəklərini deməlidirlər",- Cudiş deyib.
Onun sözlərinə görə, konsorsium bu ilin birinci rübündə həcmlər üzrə konkret öhdəliklər almalıdır ki, ilin ikinci yarısında "open season" prosesinə başlasın.
"Open season" prosesi "Nabukko" qaz kəmərinin buraxılış qabiliyyətinin satışa çıxarılmasını nəzərdə tutur.
"İnfrastrukturu təmin etmək üçün lazım olduğundan çox imkanımız var",- Cudiş qeyd edib.
Azərbaycan "Ümid" dəniz yatağından əlavə 5 milyard kubmetr qaz əldə etməyi təklif edir və Transxəzər boru kəməri tikilsə, Türkmənistan 10 milyard kubmetrdən çox nəql edə bilər. Rusiya istisna olmaqla Xəzərlə həmsərhəd olan bütün ölkələr qaz kəmərinin inşası ilə razıdır, Cudiş deyib.