Azərbaycan, Bakı, 10 mart /Trend/
Fevralda ARDNŞ (Azərbaycan Respublikası Dövlət Neft Şirkəti) Rusiyaya 170,3 milyon kubmetrə yaxın qaz ixrac edib. Yanvarda bu göstərici 190 milyon kubmetrə yaxın olub. Bu barədə şirkətin cümə axşamı yaydığı məlumatda deyilir.
Məlumata görə, yanvar-fevralda ARDNŞ tərəfindən Rusiyaya 359,24 milyon kubmetrə yaxın qaz ixrac edilib.
2010-cu ildə ARDNŞ RF-yə 800 milyon kubmetrə yaxın qaz ixrac edib. Bu il nəql edilən qazın həcminin iki milyard kubmetrə çatdırılacağı gözlənilir.
Azərbaycan qazının Rusiyaya alqı-satqısı üzrə ortamüddətli müqavilə 2009-cu il oktyabrın 14-də Bakıda imzalanıb. 2010-cu il sentyabrın əvvəlində Bakıda imzalanan müqaviləyə əlavəyə görə, 2011-ci ildə "Qazprom" iki milyard kubmetr, 2012-ci ildə isə iki milyard kubmetrdən çox qaz alacaq
Rusiyaya Azərbaycan qazının tədarükünə 2010-cu il yanvarın 1-dən başlanılıb.