Azərbaycan, Bakı, 30 mart /Trend, müxbir A.Axundov/
Liviyadakı hərbi əməliyyatlar Bakı-Tbilisi-Ceyhan neft kəməri ilə nəql olunan Azərbaycan neftinin göndərildiyi Türkiyənin Ceyhan limanının işinə təsir etmir. Bu barədə çərşənbə axşamı Trend-ə Türkiyənin BOTAŞ Dövlət Boru Kəməri Şirkətinin törəmə strukturu olan "Botas International Limited" (BIL) şirkətindən bildiriblər.
"Limanın işi normal rejimdə gedir. Neftin yüklənməsi cədvələ uyğun olaraq həyata keçirilir", - BIL-dən deyiblər.
Liviya artıq bir neçə gündür ki, Böyük Britaniya, Fransa, ABŞ, Kanada, Belçika, İtaliya, İspaniya və Danimarkanın daxil olduğu Qərb koalisiyası qüvvələrinin irimiqyaslı raket zərbələrinə məruz qalır.
Qərb siyasətçiləri bununla da dinc Liviya vətəndaşlarını Liviya lideri Müəmmər Qəddafiyə sadiq olan təhlükəsizlik qüvvələri və hərbçilərin özbaşınalığından müdafiə etdiklərini təsdiqləyirlər.
Eyni zamand,a rəsmi Tripoli Qərb koalisiyasının zərbələri nəticəsində mülki əhali arasında onlarla qurbanın olduğu barədə məlumat verir.
Martın 1-nə olan məlumata görə, 2006-cı il iyunun 2-dən indiyədək BOTAŞ International Limited (BIL) tərəfindən Ceyhan neft terminalından Bakı-Tbilisi-Ceyhan (BTC) neft boru kəməri ilə nəql edilən 1,13 milyard barel neft yüklənilib. Bu göstərici bu il fevralın 3-dək 1,112 milyard barel olub.
Ceyhan neft terminalında neft nəqlinə başlanandan 1478 tanker 1,152 milyard barel Azərbaycan nefti ilə yüklənib.
BIL əvvəlcədən Türkiyənin BOTAŞ Dövlət Boru Kəməri Şirkəti tərəfindən xarici şirkətlərlə əlaqələrin qurulması üçün yaradılıb. 2001-ci ildə BIL BTC-nin istismarı məqsədilə yenidən qurulub.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.
BTC-nin səhmdarları BP (30,1 faiz), AzBTC (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.
