Azərbaycan, Bakı, 17 may /Trend, müxbir E.İsmayılov/
Xəzərin Azərbaycan sektorunda "Şahdəniz" qaz-kondensat yatağının işlənməsi konsorsiumu bu il oktyabrın 1-dək bütün boru kəməri qruplarından yatağın tammiqyaslı işlənməsi çərçivəsində qaz nəqli üzrə konkret təkliflər gözləyir. Bu barədə Britaniyanın BP şirkətinin hesabatında deyilir.
Məlumata əsasən, "Şahdəniz"dən qaz satışı üzrə uzunmüddətli müqavilələrə nail olmağa yardım göstərilməsi məqsədilə bu yataqla bağlı işlənmə və məhsulun bölüşdürülməsinə dair müqavilə 2031-ci ildən 2036-cı ilədək uzadılıb. Bundan başqa, Ankarada "Nabukko", ITGI (interkonnektor Türkiyə-Yunanıstan-İtaliya), "Poseydon" və TAP (Transadriatik boru kəməri) kimi layihələrlə iş məqsədilə ixrac tranzit təşkilatı yaradılıb.
Yatağın tammiqyaslı işlənməsi çərçivəsində işlər son mərhələyə çıxıb və 2017-ci ildə ilk qazın əldə edilməsi gözlənilir.
Yatağın işlənməsinin birinci mərhələsi çərçivəsində hasilatın ən yüksək həddi 9 milyard kubmetr qaz və 50 min barel kondensat səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 24 milyard kubmetrədək çatdırmaq mümkün olacaq.
"Şahdəniz" yatağının ehtiyatları 1,2 trilyon kubmetr qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%. "Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
