Azərbaycan, Bakı, 26 may /Trend/
ARDNŞ (Azərbaycan Respublikası Dövlət Neft Şirkəti) və Almaniyanın RWE şirkəti Xəzərin Azərbaycan sektorunda yerləşən "Naxçıvan" strukturu üzrə müqavilənin imzalanmasına hazırlıq çərçivəsində əsas kommersiya prinsiplərini razılaşdırıblar. Bu barədə cümə axşamı ARDNŞ-nin prezidenti Rövnəq Abdullayev bildirib.
"Biz əsas kommersiya prinsiplərini razılaşdırmışıq və hazırda müqavilənin hazırlanması üzərində işlər aparılır", - Abdullayev bildirib.
Ötən ilin martında ARDNŞ və RWE arasında "Naxçıvan" strukturu üzrə qarşılıqlı anlaşma haqqında memorandum imzalanıb. Hazırda perspektivli strukturun kəşfiyyatı və işlənməsi üzrə PSA tipli müqavilənin hazırlanması üçün zəruri işlər görülür.
Strukturun ehtiyatları 300 milyard kubmetr qaz və 40 milyon ton kondensat həcmində proqnozlaşdırılır.
Perspektivli "Naxçıvan" strukturunun işlənməsi üzrə birinci müqavilə 1997-ci ilin avqustun 1-də imzalanıb. Layihə iştirakçıları bunlardır: ExxonMobil - 50 faiz, ARDNŞ - 50 faiz.
