Azərbaycan, Bakı, 20 sentyabr /Trend, müxbir E.İsmayılov/
Azərbaycan və Türkiyə arasında qaz sazişlərinin imzalanması oktyabra planlaşdırılır. Trend-in məlumatına görə, bunu jurnalistlərə çərşənbə axşamı ARDNŞ rəhbəri Rövnəq Abdullayev deyib.
Onun sözlərinə görə, oktyabrda tərəflər arasında yüksək səviyyəli görüş gözlənilir.
"Bu vaxta qədər biz sənədlərin razılaşdırılmasına dair bütün işləri tamamlamaq istəyirik", - Abdullayev bildirib.
ARDNŞ-nin yüksəkvəzifəli rəsmisinin dediyinə görə, tərəflər sentyabrın 26-na kimi sazişlər haqqında danışıqlar prosesini başa çatdırmaq istəyirlər. O qeyd edib ki, sənədin özünün imzalanması zaman tələb edir.
Qaz sazişlərinə "Şah Dəniz-2" layihəsindən Türkiyə üçün Azərbaycan qazının qiyməti, bu ölkəyə 2017-ci ildən sonra bu yataqdan tədarük ediləcək qazın həcmi və həmçinin qazın Türkiyə ərazisi ilə Avropaya nəql olunması sazişi daxildir.
Ererji tədarükünün mənbə və marştutlarını diversifikasiya edəcək və bununla da Aİ-nin enerji təhlükəsizliyini artıracaq "Cənub dəhlizi" layihəsi Avropa İttifaqı üçün prioritet enerji layihələrindən biridir. "Cənub dəhlizi" layihəsinə aiddir: "Nabukko" qaz kəməri, Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya qaz kəməri).
Bu layihələr üçün əsas mənbələrdən biri kimi Azərbaycanın 1,2 trilyon kubmetr qaz ehtiyatı ilə "Şahdəniz" yatağı hesab edilir.
Yatağın ikinci mərhələsindən hasil olacaq qaz "Cənub dəhlizi" layihəsi üçün əsas mənbə hesab olunur. Azərbaycan bu mərhələdən Avropaya 10 milyard kubmetr qaz tədarük etmək istəyir.