Azərbaycan, Bakı, 22 sentyabr /Trend, müxbir A.Bədəlova/
ITGI layihəsi "Cənub qaz dəhlizi"nin açılması üçün nisbətən daha yaxşı variantdır. Bu barədə cümə axşamı Yunanıstanın DEPA şirkətinin rəhbəri Qari Saçinis Bakıda keçirilən "Gas Infrastructure World Caspian" konfransında bildirib.
Saçinisin sözlərinə görə, bu gün mühüm olan "Cənub qaz dəhlizi"nin açılmasıdır.
Hazırda "Cənub qaz dəhlizi" layihələri üçün yeganə mövcud mənbə Azərbaycanın "Şahdəniz" qaz yatağıdır.
Onun sözlərinə görə, ITGI layihəsi 2017-ci ilə kimi 10 milyard kubmetr qazın nəqli üçün hazır ola bilər. Azərbaycan bu həcmi "Şahdəniz" yatağının işlənməsinin ikinci mərhələsi çərçivəsində Avropaya nəql etmək fikrindədir. Bütün sistemin maksimum buraxılış qabiliyyəti 24 milyard kubmetrə çata bilər.
Saçinisin bildirdiyinə görə, ITGI layihəsi "Şahdəniz"in işlənməsi konsorsiumunun qaz nəqli üçün daha üstün tutulan marşrutun seçimi üzrə bütün əsas meyarlarına uyğun gəlir.
Yunanıstan şirkətinin rəhbəri Azərbaycanla Türkiyə arasında tranzit sazişin tezliklə imzalanacağına ümidini ifadə edib.
Türkiyə ilə sazişin bağlanması "Şahdəniz" başda olmaqla, Azərbaycan yataqlarından qazın Türkiyə ərazisi ilə Avropaya nəqli üçün vacibdir.
"Şahdəniz" yatağının işlənməsinin ikinci mərhələsi çərçivəsində hasil olunan qaza "Cənub qaz dəhlizi" layihələri üçün əsas mənbə kimi baxılır. Azərbaycan "Şahdəniz-2" layihəsi üzrə Avropaya 10 milyard kubmetr qaz nəql etməyi planlaşdırır.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LUKoil" - 10%, TPAO - 9%, ARDNŞ - 10%.
Hazırda Gürcüstana və Türkiyəyə qaz Cənubi Qafqaz qaz kəməri ilə nəql olunur.
Yatağın işlənməsinin birinci mərhələsi çərçivəsində hasilatın ən yüksək həddi 9 milyard kubmetr qaz və 50 min barel kondensat səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 24 milyard kubmetrədək çatdırmaq mümkün olacaq. "Şahdəniz" yatağının ehtiyatları 1,2 trilyon kubmetr qiymətləndirilir.