Azərbaycan, Bakı, 30 sentyabr /Trend, müxbir E.İsmayılov/
2007-2011-ci illər ərzində Azərbaycan Respublikası Dövlət Neft Şirkəti (ARDNŞ) Gürcüstan və Türkiyədəki layihələrə 2 milyard dollardan çox investisiya yatırıb. Trend-in məlumatına görə, bu barədə ARDNŞ-nin "Müstəqil Azərbaycan 20 ildə" milli sərgisindəki rəsmi stendində açıqlanan proqnozlarda deyilir.
Sərgi sentyabrın 27-29-da "Baku Expo Center" sərgi mərkəzində keçirilib.
İnvestisiyaların ümumi həcmindən 1,66 milyard dollar ARDNŞ-nin səhmdarı olduğu "Petkim" neft-kimya kompleksinin payına düşür.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
Məbləğin qalan hissəsi (470 milyon dollar) ARDNŞ-nin Gürcüstanda həyata keçirdiyi layihələrin payına düşür. Xüsusilə, bunlar arasında Kulevidəki Qara dəniz neft terminalına, yanacaqdoldurma məntəqələrinin, həmçinin paylayıcı qaz şəbəkələrinin təşkilinə qoyulan investisiyalar var.
Hazırda ARDNŞ Gürcüstanda 70-dən çox yanacaqdoldurma məntəqəsinə malikdir. Həmçinin, şirkət Gürcüstanda 30 paylayıcı qaz təsərrüfatını idarə edir və burada qaz proqramını həyata keçirir.
