Azərbaycan, Bakı, 25 oktyabr /Trend, müxbir E.İsmayılov/
Proqnozlara əsasən, 2015-ci ildə Azərbaycanda elektrik enerjisi istehsalının həcmi 22,3 milyard kilovat-saata çatacaq. Cari ildə bu rəqəmin 18,6 milyard kilovat-saat olacağı proqnozlaşdırılır. Trend-in məlumatına görə, bu barədə baxılması üçün ölkənin Milli Məclisinə təqdim edilən 2012-ci il və növbəti üç il üzrə dövlət büdcəsi layihəsində deyilir.
2010-cu ildə Azərbaycanda 17,7 milyard kilovat-saat elektrik enerjisi istehsal edilib.
Proqnozlara əsasən, qarşıdakı ildə ölkədə 19,2 milyard kilovat-saat elektrik enerjisi istehsalı planlaşdırılır. 2013-cü ildə isə bu göstərici 19,8 milyard kilovat-saatdan çox olacaq. 2014-cü ildə Azərbaycanda elektrik enerjisi istehsalının həcmi 21 milyard kilovat-saatı ötəcək.
"Azərenerji" ASC Azərbaycanda elektrik enerjisinin əsas istehsalçısı və paylayıcısı rolunda çıxış edir.
Hazırda SC-nin balansında gücü 500, 330, 220 və 110 kilovolt olan 200-dən çox yarımstansiya, eləcə də altı su elektrik stansiyası və 13 istilik elektrik stansiyası var. ASC 1998-ci ildə dövlət şirkətinin bazasında yaradılıb. ASC-nin bütün 100 faiz səhmləri dövlətə məxsusdur.