Azərbaycan, Bakı, 9 yanvar /Trend, müxbir E.İsmayılov/
"SOCAR Petroleum" şirkəti iki ay ərzində Azərbaycandakı yanacaqdoldurma məntəqələrində (YDM) yeni nəzarət-kassa aparatlarını quraşdıracaq. Bu barədə Trend-ə bazar ertəsi YDM operator şəbəkəsinin həmtəsisçisi qismində çıxış edən ARDNŞ-dəki (Azərbaycan Respublikası Dövlət Neft Şirkəti) mənbə deyib.
Mənbənin sözlərinə görə, "SOCAR Petroleum" şirkəti Azərbaycan Vergilər Nazirliyi qarşısında iki ay ərzində yeni aparatların quraşdırılması ilə bağlı öhdəlik götürüb.
"Hazırda əsas vəzifə SOCAR brendi altındakı YDM-lərdə kompüter təminat sisteminin Vergilər Nazirliyinin təklif etditi kassa aparatları sisteminə uyğunlaşdırılmasıdır. Bu prosesin həyata keçirilməsi üçün iki ay vaxt müəyyənləşdirilib", - mənbə qeyd edib.
Onun sözlərinə görə, müvafiq olaraq, SOCAR brendi altındakı YDM-lərdə yeni kassa aparatları yanvar-fevral aylarında işləməyə başlayacaq.
"Təminat sistemini artıq bu ayın sonuna qədər uyğunlaşdırmaq üçün bütün addımlar atılacaq", - mənbə deyib.
O bildirib ki, yeni kassa aparatları yanacaq dolduran nasoslarda quraşdırılacaq və yanacaq avtomobilin yanacaq çəninə yalnız ödəniş edildikdən sonra çatacaq.
Hazırda Bakıda SOCAR brendi altında YDM-lərin ümumi sayı 14 ədəd təşkil edir.
Azərbaycanın vergilər naziri Fazil Məmmədov bir müddət əvvəl Nazirlər Kabinetinin müvafiq qərarının icrasını təmin etmək məqsədilə fərman imzalayıb.
Sənədə əsasən, 2012-ci il yanvarın 1-dək qeydiyyat və qəbzin verilməsi olmadan neft məhsullarının və qazın satışını bloklayan köhnə aparatların xüsusi konstruksiyaya və texniki göstəricilərə malik, dövlət reyestrində qeyd edilmiş yeni nəzarət-kassa aparatları ilə əvəz edilməsi nəzərdə tutulurdu.
Yeni nəzarət-kassa aparatlarının tətbiqi ilə əlaqədar olaraq, tədbirlər cədvəli təsdiq edilib.
Azərbaycanda təxminən 850 YDM fəaliyyət göstərir.
