Azərbaycan, Bakı, 7 may /Trend, müxbir E.İsmayılov/
Zəlzələ Azərbaycanın şimal-qərb rayonlarının istehlakçılarının qazla təminatına təsir etməyib. Bu barədə bazar ertəsi Trend-ə Azərbaycan Respublikası Dövlət Neft Şirkətindən (ARDNŞ) məlumat verilib.
"Ölkənin şimal-qərb rayonlarının qazla təchizatında problem yoxdur. Zəlzələ bu istiqamətdə qaz tədarükünə təsir etməyib", - ARDNŞ-dən deyilib.
Respublika Seysmoloji Xidmət Mərkəzindən Trend-ə verilən məlumata görə, bu gün yerli vaxtla saat 09:40-da, Zaqatala rayonundan 17 km cənub-qərbdə zəlzələ qeydə alınıb. Zəlzələ 10 km dərinlikdə, 5,50 maqnitudada qeydə alınıb.
Zəlzələ Zaqatala və Qaxda 7 bal, Şəki, Oğuz, Qazax, Tovuz və digər rayonlarda 2-5 bal arasında hiss olunub.