...

OPEK: İranın neft hasilatı bir milyon barel azalıb

Energetika Materials 12 Dekabr 2012 17:50 (UTC +04:00)
Ötən gün OPEK-in 2012-ci il üçün sonuncu aylıq (noyabr ayı üçün) məruzəsi yayımlanıb. Bu barədə Trend OPEK-in rəsmi saytına istinadən məlumat verir.

Trend-i buradan izləyin

Azərbaycan, Bakı, 12 dekabr /Trend, müxbir T.Cəfərov/

Ötən gün OPEK-in 2012-ci il üçün sonuncu aylıq (noyabr ayı üçün) məruzəsi yayımlanıb. Bu barədə Trend OPEK-in rəsmi saytına istinadən məlumat verir.

OPEK öz məruzəsində İran neftinin noyabr ayında gündəlik hasilatının 2 milyon 638 min barel təşkil etdiyini və orta hesbla ötən ilin eyni dövrü ilə müqayisədə 945 min barel azaldığını bildirib.

Məruzədə İran Neft Nazirliyinin ölkənin neft hasilatı ilə bağlı OPEK-ə təqdim etdiyi statistika da yer alıb. Həmin statistikada cari ilin noyabr ayında İranın neft hasilatının gündəlik 3 milyon 708 min barel olduğu və bu rəqəmin ötən ilin eyni dövrü ilə müqayisədə hətta 132 min barel artdığı qeyd olunub.

Beynəlxalq Enerji Agentliyi, ABŞ Enerji Məlumat İdarəsi və digər beynəlxalq müəssisələrin məlumatına əsasən isə, İran neftinin istehsalı ötən bir il ərzində sutkada bir milyon barel azalıb.

Bundan başqa, İran parlamentinin bəzi nümayəndələri, o cümlədən parlament spikerinin müavini Məhəmmədrza Bahünər, parlamentin büdcə komissiyasının üzvü Qulamrza Misbahi Müqəddəm İranın neft ixracatının bir milyon barel azaldığını təsdiqləyiblər. Həmçinin, İranın bəzi rəsmiləri bildiriblər ki, "ölkənin 2013-2014-cü il büdcəsinin neftdən asılılığını azaltmaq məqsədilə cari illə müqayisədə gələn ilin büdcəsində neft ixracatının həcminin bir milyon barel azaldılacağı nəzərdə tutulur".

OPEK-in yeni məruzəsinə görə, İran OPEK-ə üzv ölkələr arasında Səudiyyə Ərəbistanı, İraq və Küveytdən sonra dördüncü yerdə qərarlaşıb. Ötən il isə İran neft hasilatına görə həmin təşkilatda ikinci yerdə dururdu.

OPEK-in 12 üzv ölkəsi sutkada 30 milyon barel neft hasilatı barədə razılaşsalar da, noyabr ayında sutkada 30 milyon 781 min barel neft hasilat ediblər.

OPEK öz yeni məruzəsində 2013-cü il üçün neft hasilatı, satışı və tələbatı ilə bağlı proqnozlarını da açıqlayıb. Məlumata əsasən, gələn il neftə tələbatın cari ildəki 89 milyon 600 min barelə nisbətdə 800 min barel artacağı gözlənilir.

Məlumatda bildirilir ki, OPEK ölkələrinin neftinə tələbat isə 2013-cü ildə sutkda 29 milyon 700 min barel təşkil edəcək.

OPEK bundan öncə elan etmişdi ki, İran ötən il 130 milyard 540 milyon dollar dəyərində məhsul ixrac edib. Bu rəqəmin 114 milyard 750 milyon dolları neft və kondensat ixracatının payına düşür. Bu isə o deməkdir ki, İranın gəlirlərinin 84 faizi birbaşa neftdən əldə olunur.

Məqalədə:
Xəbər lenti

Xəbər lenti