Azərbaycan, Bakı, 30 mart /Trend, müxbirlər D.Xatınoğlu, E.Tariverdiyeva/
ABŞ İran neftinin ixrac həcmlərinin dəyişməsindən çox da narahat deyil. Trend-in məlumatına görə, bunu ABŞ Dövlət Departamentinin İran üzrə rəsmi nümayəndəsi Alan Eyr onlayn mətbuat konfransında deyib.
Onun sözlərinə görə, İranın neft ixracından gəlirləri ötən il ərzində 40 milyon dollar azalıb, lakin 2012-ci ilin dekabr ayından sonra gəlirlər yenidən artaraq 2013-cü ilin yanvar və fevral aylarında, müvafiq olaraq, sutkada 1,28 milyon barel və 1,4 milyon barelə çatıb.
Eyr bəyan edib ki, ixrac həcminin belə artımı neft bazarında mövsümi dəyişikliklərin nəticəsi ola bilər. O əlavə edib ki, bir neçə aydan sonra ixrac həcmi yenidən azalacaq.
"Sanksiyalar (İranın neft sektoruna qarşı) təkcə ABŞ tərəfindən tətbiq edilməyib. Bütün beynəlxalq ictimaiyyət İranın əsas öhdəliklərinə sadiq qalmasını arzulayır", - o deyib.
Eyrin sözlərinə görə, beynəlxalq ictimaiyyət İranın siyasətini dəyişərək danışıqlar masası arxasına keçməsinin lehinə çıxış edir.
Onlayn sessiyada bir neçə jurnalistlə iştirak edən Alan Eyr İran haqqında, ölkənin nüvə proqramı və digər məsələlərlə bağlı sualları cavablandırıb.
