Azərbaycan, Bakı, 5 iyun /Trend, müxbir E.İsmayılov/
Xəzərin Azərbaycan sektorundakı "Ümid" və "Abşeron" yataqlarında qaz ehtiyatları 600 milyard kubmetr təşkil edir. Trend-in məlumatına görə, bu barədə çərşənbə günü jurnalistlərə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev deyib.
Onun sözlərinə görə, Azərbaycanın bir çox qaz yataqları və perspektiv strukturları var: "Perspektivdə qaz həmin mənbələrdən Trans-Anadolu qaz kəməri ilə nəql edilə bilər. Xüsusilə, bu yaxınlarda "Ümid" və "Abşeron" yataqları açılıb".
"Babək" perspektiv strukturunun işlənməsi məsələsinə gəlincə, Abdullayev qeyd edib ki, burada işlər üzən qazma qurğusunun olmasından asılıdır. Xüsusilə, artıq 2016-cı ildə ARDNŞ-nin sərəncamına yeni qazma qurğusu veriləcək. Bu qurğu suyun 1000 metr dərinliyində qazma işləri aparmağa imkan verəcək.
