Azərbaycan, Bakı, 1 iyul/Trend, müxbir E. İsmayılov/
Azərbaycanın "Şahdəniz" qaz-kondensat yatağının işlənməsi layihəsinin səhmdarları Trans Adriatik qaz kəməri (TAP) layihəsini seçdikdən sonra Azərbaycan Respublikası Dövlət Neft Şirkətinin (ARDNŞ) Yunanıstanın DESFA şirkətinin özəlləşdirilməsində iştirakının vacibliyi daha da artdı.
Trend-in məlumatına görə, bu barədə ARDNŞ-nin prezidenti Rövnəq Abdullayev AzTV telekanalına müsahibəsində deyib:
"DESFA-nın özəlləşdirilməsində iştirak kommersiya layihəsidir. DESFA-da iştirak payının alınması ARDNŞ üçün böyük imkanlar yaradır. Xüsusilə, DESFA LNG terminala malikdir ki, bu da sıxılmış qazı Yunanıstana tədarük etməyə, sonra isə Balkan ölkələrinə qaz tədarükünü təmin etməyə imkan verəcək".
DESFA-da iştirak payının əldə edilməsi ARDNŞ-ə Balkan ölkələrində müxtəlif investisiya layihələrində və xüsusilə Albaniyanın qazlaşdırma prosesində iştirak etməyə imkan verəcək. Hazırda Albaniyada bu proses çox aşağı səviyyədədir.
ARDNŞ-nin DESFA-da iştirak payının alınması məsələsinə gəlincə, Abdullayev qeyd edib ki, hazırda Yunanıstan şirkətinin aktivlərinin alqı-satqısı barədə müqavilə üzərində iş gedir və artıq bir neçə ay ərzində proses tamamlanacaq.
