Dekabrın 19-da Azərbaycan həmkarlar ittifaqları Konfederasiyasında Bosshelf şirkətində həmkarlar ittifaqının yaradılması ilə bağlı təsis konfransı keçirilib. Neft və qaz sənayesi işçilərinin Respublika Həmkarlar İttifaqları Komitəsindən Trend ə verilən məlumata görə, konfransda konfederasiyanın sədri Səttar Mehbalıyev, NQSİRHİK-nın sədri Cahangir Əliyev, neftçilərin hüquqlarını müdafiə komitəsinin sədri Mirvari Qəhrəmanlı, ombudsman Elmira Süleymanova və başqaları iştirak edib.
Konfransda NQSİRHİK-in nizamnaməsinin qəbul olunması və yeni strukturun NQSİRHİK-in tərkibinə daxil edilməsi qərara alınıb.
Tədbirdə komitənin rəhbər orqanları seçilib və nəzarət-təftiş komissiyasının 5 nəfərdən ibarət tərkibi təsdiqlənib.
Açıq səsvermə yolu ilə əvvəllər Bosshelf şirkətinin təşəbbüs qrupuna rəhbərlik etmiş Allahyar Eyyubov komitənin rəhbəri seçilib. Nizamnaməyə əsasən, komitənin 19 üzvündən 9-u rəyasət heyətinə qəbul olunub.
