Azərbaycan Gürcüstana İran qazının tədarükünün texniki imkanlarını öyrənir. Bu barədə Trend ə Azərbaycanın Sənaye və Energetika nazirliyindən məlumat verilib. Hazırda Azərbaycan Gürcüstana sutkada 2 mln m3 qaz verə bilər. Qazın verilmə həcmini artırmaq üçün təzyiqi artırmaq lazımdır, lakin qazın verilməsi infrastrukturu lazımi səviyyədə olmadığı üçün bu, yalnız qəzalara səbəb ola bilər.
Gürcüstan Azərbaycan ərazisindən tranzitlə İrandan qaz almaq niyyətindədir. İran tərəfi müvafiq infrastrukturun olduğu Astaraya qaz verə bilər. Lakin bunun üçün Azərbaycan-İran qaz kəmərinin reversi həyata keçirilməlidir. Buna əsasən, Azərbaycan İrana qaz tədarük edir, İran isə öz növbəsində analoji həcmləri Naxçıvan Muxtar Respublikasına verir.
Nazirliyin nümayəndələrinin qeyd etdiyi kimi, Azərbaycan NMR-ə verilən qazı Gürcüstana gedəcək qazla birləşdirərək qarşılıqlı hesablaşa bilər.
