Azərbaycan Dövlət Neft şirkətinin prezidenti Rövnəq Abdullayev Rumıniya-Azərbaycan birgə Ticarət Palatasının prezidenti Georq Draqomirin rəhbərlik etdiyi nümayəndə heyəti ilə görüşüb. Trend in xəbər verdiyi kimi, bu barədə ARDNŞ-in mətbuat xidmətindən məlumat verilib.
Ticarət-Sənaye Palatası rəhbəri qeyd edib ki, Palatada təmsil olunan Rumıniya şirkətləri Azərbaycana böyük maraq göstərir. O, ARDNŞ başçısına Rumıniyanın "Neptun" şirkətinin əməkdaşlarını təqdim edib. Şirkət nümayəndələri quyular üçün istehsal etdikləri nasoslardan və digər avdanlıqlardan danışıb, bu müəssisənin avdanlıqlarının dünyanın müxtəlif nöqtələrində iş prosesində tətbiq olunduğunu qeyd edib.
Vaxtilə iki belə nasos Azərbaycana da göndərilmişdi. Şirkət nümayəndələri bu istiqamətdə əməkdaşlığın genişləndirilməsində maraqlı olduqlarını vurğulayıb. R.Abdullayev qeyd edib ki, ARDNŞ Rumıniya şirkətləri ilə əməkdaşlığa hazırdır.
Görüşdə qarşılıqlı maraq doğuran digər məsələlərə də toxunulub.
