Binagadi Oil əməliyyat şirkəti quruda yerləşən "Binəqədi" yatağında yeni quyuların qazılmasına hazırlıq üzrə fəal iş görür. "Əsasən, indi iri həcmli işə hazırlıq görülür. Şirkət sahənin geoloji modelini almaq üçün Yataqların modelləşdirilməsi Mərkəzinə sifariş verib", - deyə Azərbaycan Dövlət Neft Şirkətindən Trend ə məlumat verilib.
"İndi quyuların əlamətlərinin rəqəmlərlə verilməsi və digər işlər davam etdirilir. Bununla yanaşı, yataqda mövcud quyulardan hasilat davam edir. Yataq tədqiq olunduqdan sonra orada yeni quyuların qazıntısı üzrə bilavasitə işlərin görülməsi başlanacaq", - deyə ARDNŞ-dən bildirilib.
Quruda yerləşən "Binəqədi" yatağının blokundan hasilatın kəşfiyyatı, reabilitasiyası, işlənməsi və paylar üzrə bölüşdürülməsi haqqında saziş (HPBS) ARDNŞ və AZEN şirkəti (bərabər payla Türkiyənin ENKA və Azərbaycanın AzPetrol şirkətinin birgə müəssisəsi) tərəfindən iyunun 18-də Bakıda imzalanıb. Həmin sazişdə ARDNŞ-ə 25%, AZEN şirkətinə isə - 75% məxsusdur. Həm də ARDNŞ payının maliyyələşdirilməsi AZEN şirkəti tərəfindən həyata keçiriləcək.
HPBS -nin şərtlərinə əsasən AZEN üç il ərzində müqavilə blokunda neftin sutkalıq həcminin 1,5 dəfə artırılması üzrə öhdəliyi öz üzərinə götürür. Şirkət həmçinin 1 mln. ABŞ dolları həcmində bonus ödəyəcək. Ümumi sahəsi 4,3 min ha olan blok 1896-cı ildən işlənir. Onun ümumi geoloji ehtiyatları 132 mln. ton neft, çıxarılan ehtiyatları isə - 12,8 mln. ton təşkil edir. Hazırda sutkalıq neft hasilatı 286 ton təşkil edir (2003-cü ildə 106 min ton).