2006-cı ilin sonuna kimi qaz kondensatlı "Şahdəniz" yatağında üç istismar quyusu fəaliyyətə başlaya bilər. Bu haqda Trend -ə Azərbaycan Sənaye və Energetika Nazirliyindən bildiriblər. Yataqda qazma proqramı çərçivəsində cəmi 4 quyu qazılıb.
Dünən "Şahdəniz" yatağından ilk təbii qaz çıxarılmağa başlanıb. Qaz indi sazlama işlərinin sona çatdırılması və "Şahdəniz" layihəsi çərçivəsində qaz mexanizmlərinin istismara verilməsi üçün Səngəçala ötürülür. Bundan sonra tullantılar üçün nəzərdə tutulan xətlərin qazıntı platformasına birləşdirilməsi ilə əlaqədar quyuda hasilat qısa müddət ərzində dayandırılacaq. Nəticədə analoji işlərin ikinci quyuda başlanması planlaşdırılır.
Hazırda layihə üzrə partnyorlar Azərbaycana Cənub Qafqaz qaz borusunu testdən keçirmək üçün istifadə olunan qaza görə borclarını qaytarır.
İştirakçılar tərəfindən "Şahdəniz" layihəsinə görə Azərbaycana borcların ödəməsi bir neçə gün ərzində davam edəcək ki, bundan sonra Bakı-Tiflis-Ərzurum sisteminə əsasən qaz ixracına başlanması istisna olunmur.