Azərbaycan, Bakı/ Trend müxbir S.Babayeva/ Azərbaycanın quruda olan "Hövsan-Zığ" neft yatağının işlənilməsində ARDNŞ-lə birgə fəaliyyət göstərən "RussNeft" neft şirkəti Azərbaycanın Ekologiya və Təbii Sərvətlər Nazirliyinə neft-qaz əməliyyatları aparılarkən ətraf mühitə təsirin qiymətləndirilməsi (ƏMTQ) barədə hesabat təqdim etməyə hazırlaşır. Bu barədə cümə günü ekologiya naziri Hüseyn Bağırov bildirib.
"RussNeft"in Bakı nümayəndəliyi mayın 3-dən fəaliyyət göstərəcək.
Rusiya şirkəti noyabr ayında ARDNŞ-lə "Hövsan-Zığ" yatağının birgə işlənilməsi barədə PSA tipli saziş imzalayıb. Iştirak payının 25 faizi ARDNŞ-ə, 75 faizi isə Rusiya şirkətinə məxsusdur. Müqaviləyə görə, iki ildən sonra şirkət neft hasiliatını 1,5 dəfəyə qədər artırmalıdır.
"Zığ" yatağının müqavilə zonası 65 kvadrat kilometr, qalıq neft ehtiyatları isə 12 mln. tondur. Yataq 1935-ci ildə istismara verilib. 1948-ci ildə istismara verilən "Hövsan" yatağının hazırda hasilatı 260 min ton neft və 90 min kubmetr qaz təşkil edir.
"RussNeft" ASC 2002-ci ildə yaradılıb. Hazırda şirkətin illik hasilatı 17 mln. ton neft, hasil edə biləcəyi neftin həcmi isə 630 mlln. tondan çoxdur.
"Hövsan"-"Zığ" yataqlarının istismarı ilə isə "RussNeft Abşeron İnvestments Limited" əməliyyat şirkəti məşğul olacaq.