Azərbaycan, Bakı/müxbir Trend S.Əliyev/ "Şahdəniz" yatağından 480 mln. kubmetr qaz hasil olunub. Bu barədə çərşənbə günü 14-cü "Xəzər neft və qaz" konfransında çıxış edən Azərbaycan Dövlət Neft Şirkətinin prezidenti Rövnəq Abdullayev məlumat verib.
Onun sözlərinə görə, 2015-ci il üçün bu yataqdan ümumi qaz hasilatı 20 mlrd. kubmetr qaz təşkil edəcək.
Abdullayevin sözlərinə görə, bu gün Azərbaycan Dövlət Neft Şirkəti şəxsi qaz hasilatının artırılması üzrə proqramı reallaşdırır. 2008-ci ildə dövlətə qazın verilməsi 8 mlrd. kubmetr təşkil edəcək, bu da 2005-ci il göstəricisini 2,5 dəfə artıracaq.
2005-ci ildə Azərbaycanda neft hasilatı 32,3 mln. ton təşkil edib ki, bu da rekord göstəricidir. Bu il respublikada neft hasilatı 43 mln. tonu üstələyəcək. 2010-cu ildə bu göstərici 65 mln. tona bərabər olacaq.
Keçən il Dövlət Neft Şirkəti ölkə xaricində üç nümayəndəlik açıb - Gürcüstan, Rumıniya və Türkiyədə. Bu nümayəndəliklər neft və qaz marketinqi ilə məşğul olur. Gələcəkdə Avropanın digər ölkələrində yeni nümayəndəliklərin açılması planlaşdırılır, deyə ADNŞ prezidenti qeyd edib.
