Azərbaycan, Bakı, 17 mart / Trend , müxbir S.Babayeva / İlin sonuna qədər Xəzər seqmentinin Trans-Asiya-Avropa (TAE) fibrooptik kabel magistralının tikintisi layihəsi üzrə mütəxəssis təyin oluna bilər. Bu barədə bazar ertəsi Azərbaycanın Rabitə və İnformasiya Texnologiyaları Nazirliyindən məlumat verilib.
"Biz Qazaxıstan tərəfə lazımi sənədləri təqdim etmişik və onlardan cavab gözləyirik" - deyə nazirlikdən bildirilib. Mütəxəssis layihə çərçivəsində TİƏ hazırlamalıdır.
Nazirlikdən məlumat verilib ki, üç böyük şirkətdən verilən təkliflər nəzərdən keçirilir.
Azərbaycan Rabitə Nazirliyindən qeyd edilir ki, layihənin irəliləyişi bir çox səbəblərdən Qazaxıstan tərəfdən asılıdır. "İşlər intensiv surətdə aparılsa, Qazaxıstan tərəfi aktivlik göstərsə, layihənin reallaşdırılmasında problemlər gözlənilmir" - deyə nazirlikdən bildirilib.
Nazirilikdən tikinti işlərinin başlama tarixi ilə bağlı hər hansı proqnozlar verməkdə çətinlik çəkiblər. TAE-nin planlaşdırılmış marşrutu - Siyəzən (Azərbaycan ) - Aktau (Qazaxıstan) marşrutu üzrə keçəcək. Eyni zamanda, Türkmənistanla Siyəzən (Azərbaycan) və Türkmənbaşi (Türkmənistan) istiqamətində alternativ marşrutun çəkilməsi ilə bağlı danışıqlar aparılır.
Dənizin dibi ilə rabitə kabelinin tikintisinin dəyəri 1999-cu ildə aparılmış qiymətləndirmə nəticələrinə görə, 10 mln.dollar təşkil edir. Tərəflər Azərbaycan və Qazaxıstan operatoru - Azərbaycanın Rabitə Nazirliyinin Beynəlxalq Əlaqələr və Hesablama Mərkəzi və Qazaxıstanın "KazTrans Com" arasında imzalanmış protokola malikdir. Bu sənədə əsasən, xərclərin 50 faizi Azərbaycan, 50 faizi isə Qazaxıstan tərəfindən ödəniləcək.
Qazaxıstan və Azərbaycan arasında marşrutun uzunluğu 380 km.dir. Hazırda fəaliyyət göstərən marşrut Azərbaycan ərazisini dolanaraq, Türkmənistan və İran ərazisindən keçir.
Azərbaycan Rabitə Nazirliyindən hesab edirlər ki, TAE kabelinin çəkilməsi layihəsinin Azərbaycan ərazisindən keçməsi marşrutu təxminən 2000 km. ixtisara salacaq. Bu da informasiya ötürülmə trafikini sürətləndirəcək.
