Azərbaycan, Bakı, 06 avqust/ Trend , müxbir S.Babayeva/ Azərbaycanın təşəbbüskarı olduğu "Qərb-Şərq" informasiya magistralının çəkilməsi üzrə ilkin danışıqları noyabrda keçirmək planlaşdırılır. Bu barədə rabitə və informasiya texnologiyaları naziri Əli Abbasov Nazirlər Kabinetinin prezident İlham Əliyevin sədrliyi ilə keçən və 2008 - ci ilin I yarısında sosial-iqtisadi inkişafın yekunlarına həsr olunmuş iclasında məlumat verib.
Nazirin sözlərinə görə, təxminən 20 ölkənin nümayəndəsinin iştirak edəcəyi görüşü BakuTel 2008 beynəlxalq telekommunikasiya sərgisi çərçivəsində, noyabrda Bakıda keçirmək nəzərdə tutulub.
"Bu magistral telekommunikasiya sahəsində iki ən inkişaf etmiş regionu - Qərbi Avropa və Şərqi Asiyanı birləşdirəcək. O, 20 -yə yaxın nisbətən az inkişaf etmiş qonşu ölkələrin ərazisindən keçəcək", - nazir bildirib.
Mütəxəssislərin rəyinə görə, bu layihənin realizəsi dünyada informasiya texnologiyalarının irimiqyaslı tətbiqinə səbəb olacaq, regional iqtisadi inkişafa təkan verəcək.
Layihənin dəyəri açıqlanmır.
