Azərbaycan, Bakı, 12 noyabr/ Trend , müxbir S.Babayeva/ İlin əvvəlindən Naxçıvan Muxtar Respublikasının (NMR) telekommunikasiya sahəsinə iki mln. manat vəsait yatırılıb, - NMR-in rabitə və informasiya texnologiyaları naziri Rövşən Məmmədov bildirib.
"Biz hər il mərhələli şəkildə sərmayələri artırırıq", - Məmmədov bildirib.
Onun sözlərinə görə, 2009-cu ildə sərmayələrin həcminə dair proqnoz 2 mln. manatdan çox səviyyədə müəyyən edilib. Vəsaitlər fibroptik magistralların çəkilişi və yeni xidmətlərin tətbiqinə sərf olunacaq.
Yanvar-sentyabr ərzində NMR - də 17,2 mln. manatlıq rabitə xidməti göstərilib ki, bu da 2007-ci ilin eyni dövrünün göstəricilərini 51,5 faiz ötür. Göstərilən xidmətlərin 80,8 faizi və ya təxminən 14 mln. manat özəl şirkətlərin payına düşüb. Şirkətlərin artımı 56,4 faiz təşkil edib.
Yalnız Muxtar Respublikanın Rabitə və İnformasiya Texnologiyaları Nazirliyinin göstərdiyi xidmətlərin dəyəri təxminən 3,3 mln. manat təşkil edib və 2007-ci ilin yanvar-sentyabrı üzrə göstəriciləri 33,6 faiz qabaqlayıb.
Doqquz ay ərzində idarə 2912 ədəd telefon xətti çəkib.
Muxtar Respublika Azərbaycanın qərb hissəsində yerləşir. Şimalda və Şərqdə Ermənistan, Qərbdə və Cənubda - Türkiyə və İranla həmsərhəddir. NMR-in ümumi sahəsi 5,5 min kv. km., əhalisi 360 min nəfərdən çoxdur. Muxtar Respublikanın paytaxtı Naxçıvan şəhəridir.