Azərbaycan, Bakı, 10 iyul / Trend , müxbir H.Vəliyev /
Azərbaycan və İran sərhədyanı ərazilərdə GSM tezliklərinin koordinasiyası məsələlərini razılaşdırıblar. Bu barədə cümə günü Trend -a Rabitə və İnformasiya Texnologiyaları Nazirliyindən (RİTN) bildiriblər.
RİTN-dən bildirildiyi kimi, İranda bununla ilə bağlı təşkil edilmiş tədbirdə Azərbaycanın üç mobil rabitə operatorunun və İranın iki şirkətinin nümayəndələri iştirak ediblər. Əsas məqsəd tezliklərin kəsişməsi hallarının aradan qaldırılması və sərhədyanı ərazilərdə mobil rabitənin normal funksiya göstərməsinin təmin edilməsidir.
Görüşün yekunları üzrə iki ölkənin operatorları arasında tezlik resurslarının bərabər səviyyədə istifadə edilməsi məsələləri razılaşdırılıb. Belə ki, sərhədyanı ərazilərdə GSM operatorlara digər tərəfin istifadə etməyəcəyi konkret tezlik resursları ayrılıb.
Görüşün yekunlarına dair protokol imzalanıb. Bənzər müqavilə hazırda digər ölkələrlə də mövcuddur.
Yaxın zamanlarda İran tərəfi ilə teleradioverilişlər haqqında razılaşma nəzərdə tutulub.
Məqalə müəllifi ilə əlaqə ünvanı: [email protected]
