Azərbaycan, Bakı, 29 avqust / Trend , müxbir Q.Vəliyev /
Türkiyədən Azərbaycana yüksək sürətli kabel magistralının çəkilməsi layihəsinin uğurla həyata keçirilməsi Azərbaycanda internet xidmətləri qiymətinin əhəmiyyətli şəkildə azalmasına və ölkəyə daxil olan trafik həcminin artırılmasına imkan verəcək, bu barədə Trend -a İnformasiya Problemlərinin Araşdırılması Mərkəzinin rəhbəri Yaşar Hacıyev bildirib.
Hazırda layihə müzakirə mərhələsindədir. Onun həyata keçirilməsi Azərbaycanın internet bazarında canlanmaya səbəb ola bilər.
Hacıyevin fikrincə, bu kabel magistralının çəkilməsi üzrə iki variant mövcuddur: ya Bakı-Tbilisi-Ceyhan dəmiryolunun inşası layihəsi çərçivəsində paralel şəkildə həyata keçiriləcək, ya da ayrıca layihə qismində reallaşdırılacaq.
Bu layihə bütün tərəflərə böyük divident gətirə bilər. Hazırda trafik Azərbaycana Rusiya ərazisindən salınan iki optik xətt üzrə daxil olur. Həmin xətt üzrə trafik Avropa ölkələrinə də daxil olur. Məhz buna görə beynəlxalq trafikin qiyməti beynəlxalq magistrallarda yerləşən (və tariflərin çox aşağı olduğu) Avropa ölkələri ilə müqayisədə Azərbaycana çox baha başa gəlir.
"Həm telekommunikasiya, həm də digər sahələrdə həyata keçirilən layihələr çox vaxt uzun müddət müzakirə olunur, dəqiq şəkildə təhlil edilir, onların tez bir zamanda həyata keçirilməsi isə siyasi qərar qəbul edildikdən sonra baş verir. Layihənin texniki tərəfinə gəldikdə isə, bu elə də çətin deyil. Azərbaycan ən qısa müddətdə layihənin bütün texniki məsələlərini həll etməyə qadirdir. Bu layihə öz qərarını taparsa, o zaman Azərbaycana ən güclü magistrallardan biri daxil olacaq. Bu, respublika üçün böyük perspektivlər vəd edir. Sözügedən layihə beynəlxalq trafiki Azərbaycandan daxil olan Gürcüstan üçün də faydalı olacaq", - Hacıyev bildirib.
Qazaxıstan və Türkmənistan istiqamətində optik xətlərin çəkilməsi layihəsi də mühüm hesab olunur. Hazırda Azərbaycan və Türkmənistan arasında optik kabel magistralının Xəzər seqmentinin çəkilməsi üzrə müəyyən razılıq əldə olunub. İki ölkənin müvafiq orqanlarına artıq tapşırıqlar verilib və sözügedən layihə dövlətlərarası komissiyanın protokoluna salınıb. Layihənin həyata keçirilməsi üzrə ikitərəfli danışıqlar Azərbaycan Prezidenti İlham Əliyevin Türkmənistana sonuncu səfərindən sonra daha da aktivləşib. Türkmənistan tərəfi Xəzərin statusu məsələsinin həll olunmamasını nəzərə alaraq hələlik bu layihəyə ehtiyatla yanaşır.
Türkmənistanla yanaşı, Qazaxıstanla da danışıqlar aparılır. Azərbaycan Rabitə və İnformasiya Texnologiyaları Nazirliyinin Beynəlxalq Əlaqələr və Hesablama Mərkəzi və Qazaxıstanın QazTransCom şirkəti arasında imzalanan protokol mövcuddur. Protokola əsasən, layihənin maliyyələşdirilməsi birgə həyata keçiriləcək.
Azərbaycan və Türkmənistan arasında TAE Transxəzər seqmentinin çəkilməsi xeyli sərfəlidir, belə ki, bu marşrutu azaltmağa, mübadilə edilən trafik həcminin artırılmasına imkan verir, eyni zamanda Qırğızıstan və Çinə birbaşa çıxışa malikdir.
Məqalə müəllifi ilə əlaqə ünvanı: [email protected]
