Azərbaycan, Bakı, 02 sentyabr / Trend , müxbir H.Vəliyev /
Dövlət poçt operatoru "Azərpoçt" MMC sentyabrın sonunadək avtomatlaşdırılmış korporativ-informasiya sistemlərinin yaradılması üzrə texniki işləri başa vuracaq. Bu barədə Trend -a çərşənbə günü Azərbaycanın Rabitə və İnformasiya Texnologiyaları Nazirliyinin poçt rabitəsi şöbəsinin müdiri Novruz Məmmədov bildirib.
Məmmədovun sözlərinə görə, paralel olaraq Azərbaycan Mərkəzi Bankı ilə də maliyyə xidmətlərinin göstərilməsi üçün lisenziyanın alınması üzrə danışıqlar aparılır. Bu məsələyə dair danışıqlar tamamlanma mərhələsindədir və tələb olunan hüquqi və normativ sənədlərin hazırlanmasının tamamlanmasından sonra lisenziyanın alınması oktyabrın sonunadək gözlənilir.
"Maliyyə xidmətlərinin göstərilməsi üzrə lisenziyanın alınması üsulu da poçt rabitəsi vasitəsilə maliyyə xidmətlərinin göstərilməsi kimi mürəkkəb proseslərdən biridir. Böyük səhvlərə yol verməmək üçün dəqiq yanaşma vacibdir. Bununla əlaqədar olaraq treninqlərin keçirilməsi yolu ilə əməkdaşların kadr potensialının təkmilləşdirilməsi üzrə işlər mərhələlərlə həyata keçiriləcək", - Məmmədov bildirib.
Ötən həftə Yunanıstanda "Azərpoçt"un avtomatlaşdırılmış korporativ-informasiya sistemlərinin yaradılması üzrə rəhbər komitənin növbəti iclası keçirilib.
Komitənin tərkibinə Azərbaycanın Rabitə və İnformasiya Texnologiyaları Nazirliyinin, Azərbaycan Mərkəzi Bankının, "Azərpoçt", "Hewlett-Packard", "Sinam" və "Colvir" şirkətlərinin nümayəndələri daxildir.
Avtomatlaşdırılmış korporativ-informasiya sistemləri üzrə ilk sınaq işləri "Azərpoçt" MMC-nin 1 saylı filialının 10 saylı poçt şöbəsində həyata keçirilib. Real vaxt çərçivəsində şəhər telefon ödəmələrinin qəbulu üzrə ilk əməliyyatlar həyata keçirilib. APUS sistemi üzrə kommunal ödəmələrin qəbulu əməliyyatı üzrə sınaq işləri həyata keçirilib. APUS və avtomatlaşdırılmış korporativ-informasiya sistemləri arasında informasiya mübadiləsi həyata keçirilib.
Poçt şöbələrinin geniş şəbəkəsi sayəsində "Azərpoçt" özündə ən uzaq yaşayış məntəqələrinin sakinlərini, bütün respublikada xidmət göstərən 70 filial və 1600 poçt rabitəsi obyektini birləşdirir.
Məqalə müəllifi ilə əlaqə ünvanı: [email protected]
