Azərbaycan, Bakı, 16 oktyabr / Trend , müxbir Q.Vəliyev/
AZEL şirkəti Azərbaycan dövlət reyestrinin torpaq kadastrına aid məlumatlarının saxlanılması üçün proqram-aparat kompleksinin qurulması işlərini həyata keçirir, şirkətin rəhbəri İqor Yakovenko jurnalistlərlə söhbətində deyib.
AZEL Dünya Bankının (DB) lazımi İT avadanlıqlarının təchizatı ilə əlaqədar elan etdiyi tenderin qalibi olub. Yakovenkonun sözlərinə görə, işlər son mərhələdədir.
Azərbaycan hökumətilə DB arasında daşınmaz əmlakın tək kadastr sisteminin birgə idarə olunması barədə razılıq 2007-ci ilin uyul ayında imzalanıb.
Layihə dörd hissədən ibarətdir - daşınmaz əmlakın qeydiyyatı, dövlət əmlakının idarə olunması və reyestri, kartoqrafiya bazası və torpaq kadastrı, treninqlər, siyasətin formalaşdırılması və layihənin idarə olunması.
Layihənin dəyəri 38.57 milyon dollar təşkil edir. Bunun da 30 milyon dollar məbləği DB-nin ayırdığı kreditin payına düşür. Kredit 20 il müddətinə verilir.
AZEL şirkəti 1991-ci ildə təsis olunub. Şirkətin əsas fəaliyyətini kompyuter və ofis avadalıqlarının çatdırılması, fərdi və korporativ müştərilərə sistem inteqrasiyası və servis xidmətlərinin göstərilməsi təşkil edir. HP, Epson, Samsung, IBM, Toshiba, Microsoft, APC, Canon, JVC, Sony, Sharp, SAP, Siemens və s. kimi dünya kompyuter sənayesinin lider şirkətləri AZEL şirkətinin tərəfdaşlarıdır.
Məqalə müəllifi ilə əlaqə ünvanı: [email protected]
