Azərbaycan, Bakı, 02 noyabr / Trend , müxbir H.Vəliyev/
İslam Konfransı Təşkilatının (İKT) Gənclər Forumu tərəfindən təşkil olunan "Rəqəmsal texnologiyalar əsri və yeni nəsil" mövzusunda keçirilən konfransın yekunları əsasında "Xocalıya ədalət" aksiyasının keçirilməsi üzrə təşkilatın nümayəndələrindən ibarət işçi qrupu yaradılacaq. Qrup aksiyanın gələcək inkişafı məqsədi ilə yaradılacaq. Bu barədə Trend a İKT-nin Gənclər Forumunun baş katibi Elşad İsgəndərov bildirib.
İsgəndərovun sözlərinə görə, aksiya ilk növbədə insan hüquqları sahəsini əhatə edir. Bu gün təşkilat çərçivəsində bir çox müxtəlif aksiyalar təklif olunub və "Xocalıya ədalət" aksiyası həlledici mərhələdədir. Təqdimatda informasiya-kommunikasiya texnologiyalarının aksiyanın inkişafına nə cür təsir edə bilməsi məsələsinə toxunulub.
İsgəndərovun sözlərinə görə, ikigünlük konfrans çərçivəsində iştirakçılar İKT ölkələri gənclərinin İKT vasitəsilə iqtisadi potensialının inkişafına yönəlmiş layihələri nəzərdən keçirəcək. Konfransın gündəliyində olan əsas layihələrdən biri İKT-yə üzv ölkələrin gənc sahibkarlarının onlayn-məlumat bazasının inkişafıdır. Bu təşkilatın dünyanın 25-dən çox ölkəsində koordinasiya mərkəzi var.
Gənc sahibkarları inkişaf etdirən və ya onlar tərəfindən hazırlanan iqtisadi xarakter daşıyan layihələr informasiya mübadiləsini sürətləndirmək və biznes sahəsində onlayn-tərəfdaşlıq üçün imkanların yaradılmasına görə onlayn-məlumat bazasında toplanacaq.
İsgəndərovun sözlərinə görə, yaxın illərdə təkcə Yaxın Şərq və Şərqi Aftika regionunda 100 milyon gənc işçi qüvvəsinin bazara daxil olacağı gözlənilir. Bu qədər işçi üçün isə hələlik yer yoxdur. Təkcə dövlət proqramı hesabına işçi yerlərinin yaradılması mümkün deyil. Bunun üçün də kiçik və orta sahibkarlığın inkişafı çox vacibdir.
Konfrans işiurakçıları sosial xarakter daşıyan digər layihələri də gözdən keçiriblər. Hazırda şəbəkədə Facebook, My Space və s. bənzər resurslar populyarlıq əldə edib. İsgəndərovun fikrincə, buna görə də sosial şəbəkələri və İnternet televiziyasını özündə birləşdirən, tərkibində informasiya kontenti olan bənzər virtual məkanın yaradılması əsas vəzifələrdən biridir.
Konfrans çərçivəsində cəmiyyəti gənclərin mövcud problemləri barədə dünya səviyyəsində məlumatlandırmağa imkan verən onlayn-layihələrin yaradılması məslələrinə də toxunulacaq.
Məqalə müəllifi ilə əlaqə ünvanı: [email protected]
