Azərbaycan, Bakı, 11 iyun /Trend, müxbir H.Vəliyev/
Azərbaycanın ilk internet-provayder şirkəti Delta Telecom qərb istiqamətində alternativ rabitə xəttini istismara verib. Bu barədə cümə günü Trend-ə Delta Telecom şirkətinin texniki direktoru Rahid Ələkbərli bildirib.
Ələkbərlinin sözlərinə görə, şirkət tərəfindən uzunluğu 120 km olan əlavə tel-optik magistral xətti çəkilib, lazımi transmissiya avadanlığı instalyasiya edilib və hazırda qərb istiqamətində yeni xətt üzrə şəbəkə trafiki artıq işə salınıb.
Bu gün AzNet seqmentinin tutumu 30 Gbit/s təşkil edir ki, bunun da yalnız 4 Gbit/s-i yüklənib. Yerdə qalan hissə isə seqmentin kənar faktorlar qarşısında dözümlüyünün artırılması məqsədilə ehtiyatda saxlanılır. Delta Telecom-un trafiki İran, Rusiya və Türkiyə əraziləri vasitəsilə optik xətlər üzrə daxil olur. DWDM-in (Dense Wavelength Division Multiplexing) nəqliyyat texnologiyasından istifadə sayəsində respublika daxilində məlumatların çatdırılma sürəti 40 Gbit/s-ə çatır.
Delta Telecom şirkətinin magistral şəbəkədə məlumatların ötürülmə sürətinin aktuallığı AzNet seqmentinin real tələblərini iki dəfə ötür. Delta Telecom şəbəkəsində məlumatların ötürülməsinin real sürəti bir saniyədə 33 DVD daşıyıcısına bərabər həcmdə məlumatı yükləməyə imkan verir.
Yüksəksürətli şəbəkə infrastrukturunun olması Delta Telecom şirkətinə qonşu ölkələrlə trafik axınını realizə etməyə imkan verir. Delta Telecom-un şəbəkə infrastrukturu Rusiya və İranın telekommunikasiya infrastrukturlarını birləşdirməklə tranzit rolunu oynayır. Trafikin tranzitinə kanalın imkanının 10 faizi (1,25 Gbit/s) cəlb edilib. Ümumiyyətlə, Delta Telecom şirkətinin infrastrukturu ötürmə qabiliyyətini 10 Gbit/s-ədək genişləndirməyə imkan verir.
Trafikin müəyyən hissəsi Özbəkstan və Türkmənistana da realizə edilir.
AzNet seqmentinin inkişaf dinamikası çox zəifdir və üç il əvvəl müşahidə edilən səviyyəyə çatmır. Ələkbərlinin fikrincə bu, internet-servis-provayder və son istifadəçilər arasında infrastruktur çatışmazlığı ilə bağlıdır.
