Azərbaycan, Bakı, 4 avqust /Trend, müxbir H.Vəliyev/
Rabitə və İnformasiya Texnologiyaları Nazirliyinin hesablamalarına görə, Kür çayında suyun səviyyəsinin qalxması nəticəsində baş vermiş təbii fəlakət telekommunikasiya infrastrukturuna 2,5 milyon manat məbləğində ziyan vurub. Bu barədə çərşənbə günü rabitə və informasiya texnologiyaları naziri Əli Abbasov bildirib.
Nazirin sözlərinə görə, artıq Azərbaycanın Nazirlər Kabineti tərəfindən Rabitə və İnformasiya Texnologiyaları Nazirliyinə təbii fəlakətin törətdiyi problemlərin aradan qaldırılması ilə bağlı müvafiq göstərişlər verilib. Göstərilən pul vəsaiti idarənin öz resursları hesabına ayrılacaq.
"Bərpa işlərinin aparılması üçün bizim idarəyə üç ay vaxt verilib. Lakin bu gün sürətləndirilmiş templə həyata keçirilən planlarımıza və işlərimizə görə, bərpa işlərinin iki aya başa çatdırılması planlaşdırılır. Azərbaycanın poçt rabitəsi operatoru "Azərpoçt" MMC-yə daşqınlardan ziyan çəkmiş ailələrə kompensasiyaların verilməsi tapşırılıb. Bu istiqamətdə işlər birgə komissiyanın yaradıldığı Fövqəladə Hallar Nazirliyinin rəhbərliyi altında aparılır", - Abbasov bildirib.
Bu günədək Rabitə Nazirliyi təbii fəlakətdən qismən ziyan çəkən zonalarda bərpa işlərini artıq başa çatdırıb. Bütün köhnəlmiş telefon sistemləri yeniləri ilə əvəz olunub.
